KAHANAN

Saben dina ana-ana wae

Wong tuwa mlaku kedharang-dharang

Turut lurung

Tanpa awer-awer awake luthuk

Ngguya-ngguyu, bengak bengok, nongas nangis

Gusti Allah……

Kula nyuwun pangapunten

                                                Ngayogyakarta, 24 Juli 2017.

LAKU LAN LUMAKU

Wis rasah dho kakean muwus

Kahanan donya iki ora bakal owah gingsir

Yen mung digrenengi

Ditangisi

Apa meneh digeguyu

Wajibe kabeh kudu ngusadani

Kanthi laku kang becik

Dalane urip kang kebak perkara

Nanging ora kena banjur mung digetuni

Sebab Gusti pancen wus paring

Manungsa pirang-pirang marga kang kudu diliwati

Sapa aweh mesti bakal nampa balen

Kang luwih akeh

Sapa njupuk kudu mbalekake

Saben dina mesti ana peparinge

Ing ngendi wae papan

Nanging kudu nganggo dilakoni lan ditandangi

Rejeki ora tiba mak tlepok

Kaya codhotan sawo ing wayah bengi

                                                                                Yogyakarta, 13 Februari 2018