السلام عليكم ورحمة الله وبركاته
اَلْحَمْدُ لِلّهِ رَبِّ الْعَالَمِيْنَ نَحْمَدُهُ
وَنَسْتَعِيْنُهُ وَنَسْتَغْفِرُهُ وَنَتُوْبُ إِلَيْهِ وَنَعُوْذُ بِاللهِ مِنْ
شُرُوْرِ أَنْفُسِنَا وَسَيِّئَاتِ أَعْمَالِنَا مَنْ يَهْدِ اللهُ فَلاَ مُضِلَّ
لَهُ وَمَنْ يُضْلِلْ فَلاَ هَادِيَ لَهُ. اَشْهَدُ اَنْ لاَ اِلهَ اِلاَّ اللهُ
وَحْدَهُ لاَ شَرِيْكَ لَهُ وَاَشْهَدُ اَنَّ مُحَمَّدًا عَبْدُهُ وَرَسُوْلُهُ
وَالصَّلاَةُ وَالسَّلاَمُ عَلَى نَبِيِّنَا مُحَمَّدٍ وَعَلَى ءَالِهِ
وَاَصْحَابِهِ وَمَنْ تَبِعَهُ اِلَى يَوْمِ الدِّيْنِ. اَمَّا بَعْدُ:
فَيَاعِبَادَ اللهِ : اُوْصِيْكُمْ وَنَفْسِي بِتَقْوَ اللهِ وَطَاعَتِهِ
لَعَلَّكُمْ تُفْلِحُوْنَ. قَالَ اللهُ تَعَالَى فِى الْقُرْآنِ الْكَرِيْمِ:
يَااَيُّهَا الَّذِيْنَ اَمَنُوا اتَّقُوا اللهَ حَقَّ تُقَاتِهِ وَلاَ
تَمُوْتُنَّ اِلاَّ وَاَنْتُمْ مُسْلِمُوْنَ
Allahu Akbar, Allahu Akbar, Walillahilhamd.
Kaum Muslimin Jama’ah Shalat Ied Rahimakumullah,
Puji miwah syukur mangga kita konjukaken ngarsa dalem
Allah, ingkang sampun paring mapinten-pinten kanikmatan ingkang tanpa wicalan
dhumteng kita sedaya kaum muslimin lan muslimaat, lan salah satunggalipun
nikmat ingkang mboten saget dipun ukur agengipun inggih menika nikmat iman lan
islam ingkang kita tampi. Langkung-langkung wonten wekdal enjing menika kita
sedaya pinaringan ingkang ageng sanget. Syukur Alhamdulillah kita sedaya sampun
tuntas nindakaken tugas suci saha ayahan ageng sak dangunipun wulan Ramadhan
inggih menika siyam Ramadhan saha ibadah-ibadah sanesipun mboten wonten rubeda
satunggal menapa. Mugi Allah tansah ridha lan kersa paring ganjaran dhumateng
kita sedaya benjing ing yaumilkiyamah.
Shalawat lan salam mangga kita aturaken dhumateng
junjungan kita Nabiyullah Muhammad SAW. Mugi-mugi kita tansah kaparingan
pitedah lan kekiyatan kangge nindakaken sunnah-sunnahipun ngantos benjing akhir
gesang kita,lan isya Allah kita sedaya kaparingan syafa’at saking Rasulullah
benjing ing dinten kiyamat. Amin.
Kaum Muslimin Jama’ah Shalat Id Rahimakumullah,
Setunggal wulan nutug kita sedaya sampun nindakaken
ibadah siyam kanthi tuntas lan mboten nemahi alangan setunggal menapa. Kanthi
raos manah ingkang gembira lan kebak raos syukur, enjing menika kita sedaya
sesarengan ngumandhangaken takbir, tahlil, saha tahmid, nelakaken raos syukur
kanthi madhep menambah dhumateng Allah nindakaken shalat Idul Fitri wonten ing
papan menika. Wekdal enjing menika ugi kita tansah nyuwun wonten ngarsa dalem
Allah supados Allah kepareng ridha lan kersa nampi sedaya pangibadahan kita ing
wulan Ramadhan lan taksih ngeparengaken manggihaken kita sedaya kaliyan wulan
Ramadhan ingkang badhe dhateng.
Ibadah siyam Ramadhan ingkang sampun kita tindakaken
setunggal wulan menika minangka wujud keimanan lan ketaatan kita dhumateng
dhawuh dalem Allah SWT. Dhawuh Allah lumantar pangandikanipun wonten ing kitab
suci Al-Qur’an wonten ing Surat Al-Baqarah ayat 183;
“He wong-wong kang padha iman, diwajibake
tumrap sira nindakake siyam Ramadhan,kaya kang wus diwajibake tumrap kaum-kaum
sakdurungira kabeh, supaya sira kabeh padha taqwa”
Kita sedaya nindakaken siyam Ramadhan kanthi nyegah
dahar lan ngunjuk saha nyegah bab ingkang mbataleken siyam sewulan laminipun
menika saestu amargi nindakaken dhawuh Allah mboten karana menapa kemawon.
Ateges ugi bilih karana keimanan lan keyakinan ingkang kiyat wonten ing manah
satemah kita nyendikani dhawuh nindaaken siyam. Keyakinan ingkang kiyat menika
anjalari kita saget mbucal lan nyingkiri sedaya bab-bab ingkang ngrisak ibadah
siyam Ramadhan.
Allahu Akbar, Allahu Akbar, Walillahilhamd.
Ma’asyiral Muslimin Rahimakumullah,
Wonten ing wulan siyam kita ugi dipun sunnahaken
nindakaken ibadah-ibadah ingkang utami antawisipun nindakaken shalatul lail
utawi shalat tarwih, ngathah-ngathahaken maos al-qur’an, maos dzikir lan donga,
nindakaken I’tikaf, infaq lan shodaqoh,saha zakat fitri menapa dene zakat maal.
Ibadah siyam ramadhan ingkang sampun kita tindakaken
wetah setunggal wulan kepengker dipun wajibaken Allah mboten wonten sanes
supados manungsa ingkang iman saestu saged dados manungsa ingkang sampurna,
ingkang wonten ing Al-Qur’an kasebat manungsa ingkang muttaqin. Siyam ramadhan
menika pinangka lampah utawi margi ingkang kedah kita tindakaken kangge nggayuh
kasampurnaning lan ketaqwaanipun manungsa.
Manungsa taqwa dipun gambaraken Allah wonten ing Al-Qur’an
Surah Al-Baqarah ayat 3 – 4:
أَعُوْذُبِاللهِ مِنَ
الشَّيْطَانِ الرَّجِيْمِ
ٱلَّذِينَ يُؤۡمِنُونَ بِٱلۡغَيۡبِ
وَيُقِيمُونَ ٱلصَّلَوٰةَ وَمِمَّا رَزَقۡنَٰهُمۡ يُنفِقُونَ ٣ وَٱلَّذِينَ
يُؤۡمِنُونَ بِمَآ أُنزِلَ إِلَيۡكَ وَمَآ أُنزِلَ مِن قَبۡلِكَ وَبِٱلۡأٓخِرَةِ
هُمۡ يُوقِنُونَ ٤
“Yaiku wong-wong kang padha percaya marang
dzat kang ghaib, lan padha gelem ngedegake shalat, lan padha nginfakake
saperangan saka rizki kang wus diparingake Allah. Lan wong-wong kang padha iman
marang apa kang wus den turunake marang ummat sakdurunge, lan wong-wong kang
padha percaya anane dina akhirat”
Sawenehipun ciri lan tanda-tandanipun sarta sifat tiyang
muttaqien miturut pangandika dalem Allah ing surat Al-Baqarah menika
antawisipun:
Pitados dhumateng barang kang ghaib, purun nindakaken
shalat, paring infaq saking sakperangan rizki ingkang dipun paringaken Allah,
pitados dhumateng kitab-kitab saksderengipun Al-Qur’an, lan pitados dhumateng
dinten qiyamat utawi dinten akherat.
Manungsa taqwa menika manungsa ingkang pitados bilih
wonten dzat ingkang ghaib ingkang nemtokaken pejah gesangipun manungsa inggih
menika Allah SWT. Manungsa dipun wenangaken usaha menapa kemawon ingkang dipun
izini dening agami, nanging Allah piyambak ingkang badhe nemtokaken hasilipun.
Kanthi wenangipun manungsa ngusahaaken gesangipun menika, manungsa taqwa lajeng
dados manungsa ingkang sregep nyambut damel, mboten nate nggadhahi raos putus
asa kangge nyekapi kabetahan gesangipun wonten ing alam donya. Semantena
manungsa taqwa kedah ugi enget tujuan gesangipun wonten ing donya menika mboten
sanes tumuju dhumateng kampung akherat ingkang langkung langgeng. Pangandika
dalem Allah wonten Surat Al-Qashas 77:
أَعُوْذُبِاللهِ مِنَ
الشَّيْطَانِ الرَّجِيْمِ
وَٱبۡتَغِ فِيمَآ
ءَاتَىٰكَ ٱللَّهُ ٱلدَّارَ ٱلۡأٓخِرَةَۖ وَلَا تَنسَ نَصِيبَكَ مِنَ ٱلدُّنۡيَاۖ
وَأَحۡسِن كَمَآ أَحۡسَنَ ٱللَّهُ إِلَيۡكَۖ وَلَا تَبۡغِ ٱلۡفَسَادَ فِي ٱلۡأَرۡضِۖ
إِنَّ ٱللَّهَ لَا يُحِبُّ ٱلۡمُفۡسِدِينَ ٧٧
“Lan padha
golekana kanthi apa kang wus dianugerahake Allah marang sira kabeh kabegjan
kampung akherat, lan aja sira nglalekake kabegjan lan kanikmatan donya, lan
pada tumindaka kang becik marang sapadha-padha kaya dene Allah wus gawe becik
marang sira kabeh, lan aja sira gawe kerusakan ana ing lumahing bumi. Saktemene
Allah ora tresna marang wong kang gawe karusakan”
Ayat menika paring pitedah dhumateng kita supados kita
sedaya tansah mantep lan kanthi saestu-estu pados kabegjan ing kampung akherat
inggih menika suwarga. Kampung akherat menika ugi bab ingkang ghaib, nanging
kita sedaya kedah pitados. Tujuan gesang ingkang hakiki menika inggih kabagjan
ing kampung akherat. Kampung akherat utawi suwarga menika wontenipun benjing
menawi kita sedaya sampun wangsul katimbalan Allah SWT. Saged kawastanan bilih
gesangipun manungsa ingkang taqwa menika tansah mulad lan mriksani kanthi
saestu kawontenan wekdal sakmenika pinangka landhesan panggesangan ingkang
badhe dhateng. Sae lan mbotenipun kawontenan ing akherat benjing gumantung sae
lan mbotenipun gesang wonten ing alam donya menika.
Pangandikanipun Allah wonten ing Surat Al-Hasyr ayat
18:
أَعُوْذُبِاللهِ مِنَ
الشَّيْطَانِ الرَّجِيْمِ
يَٰٓأَيُّهَا ٱلَّذِينَ
ءَامَنُواْ ٱتَّقُواْ ٱللَّهَ وَلۡتَنظُرۡ نَفۡسٞ مَّا قَدَّمَتۡ لِغَدٖۖ وَٱتَّقُواْ
ٱللَّهَۚ إِنَّ ٱللَّهَ خَبِيرُۢ بِمَا تَعۡمَلُونَ ١٨
“He wong-wong kang padha iman, pada taqwaa sira marang
Allah, lan saben-saben jiwa padha gatekna apa kang wus den tindakake saperlu
sumadya tatapakaryan ing wektu kang bakal tumeka. Padha taqwaa sira saktemene
Allah Maha ngawuningani apa kang sira tindakake”
Manungsa muslim ingkang taqwa kedah tansah nggatosaken
pakaryan ingkang sampun dipun tindakaken, pinangka dhasaring lampah ingkang
badhe katindakaken ing wekdal saklajengipun. Bab menika wonten ing ilmu
manajemen modern dipun wastani evaluasi/panaliti utawi muhasabah. Manungsa
taqwa menika manungsa ingkang tansah nyetitekaken gesangipun pinuju dhumateng wekdal
ingkang badhe dhateng inggih menika alam akherat.
Allahu Akbar, Allahu Akbar, Walillahilhamd.
Ma’asyirah Muslimin Rahimakumullah,
Manungsa muttaqien menika ugi manungsa ingkang tansah
nindakaken shalat. Shalat ingkang sakleres-leresipun, shalat ingkang khusyu’lan
tumakninah, shalat ingkang dipun tindakaken ing awalipun wekdal, lan shalat
ingkang dipun tindakaken kanthi berjamaah ing masjid lan mushalla. Ibadah shalat
ingkang kados mekanten saget dados panyegahipun tumindak keji lan munkar, Allah
paring pangandika wonten Al-Qur’an Surat Al-Ankabut ayat 45:
أَعُوْذُبِاللهِ مِنَ
الشَّيْطَانِ الرَّجِيْمِ
وَأَقِمِ ٱلصَّلَوٰةَۖ
إِنَّ ٱلصَّلَوٰةَ تَنۡهَىٰ عَنِ ٱلۡفَحۡشَآءِ وَٱلۡمُنكَرِۗ
“Lan padha
tindakna shalat, saktemene shalat iku nyegah tumindak keji lan munkar”
Shalat ingkang saged dados sarana tansah enget
dhumateng Allah, enget dhumateng sedaya tanggel jawab gesang wonten alam donya
inggih menika ngibadah lan kumawula dhumateng Allah SWT.
وَأَقِمِ ٱلصَّلَوٰةَ
لِذِكۡرِيٓ
“Lan padha tindakna shalat pinangka sarana
eling marang Allah”
Manungsa taqwa ugi manungsa ingkang tansah purun
paring infaq dhumateng sesamining gesang, saged nahan hawa nepsunipun, lan
purun paring pangapunten dhumateng kesalahanipun tiyang sanes.. Allah negasaken
wonten Surat Ali Imran ayat 134;
أَعُوْذُبِاللهِ مِنَ
الشَّيْطَانِ الرَّجِيْمِ
ٱلَّذِينَ يُنفِقُونَ فِي ٱلسَّرَّآءِ
وَٱلضَّرَّآءِ وَٱلۡكَٰظِمِينَ ٱلۡغَيۡظَ وَٱلۡعَافِينَ عَنِ ٱلنَّاسِۗ
“Yaiku wong-wong kang pada gelem infaq ana ing kahanan
cupet utawa longgar,lan wong-wong kang padha nahan hawa nepsune lan kang gelem
paring pangapura kaluputane wong liya”
Ma’asyiral Muslimin rahimakumullah,
Allah majibaken manungsa nindakaken siyam ramadhan
supados sasksampunipun kagembleng ing wulan ramadhan manungsa nggadhahi
sifat-sifat muttaqien. Sedaya sifat taqwa menika dados modal kita sedaya
lumebet wonten wulan syawal lan wulan-wulan candhakipun. Modal ingkang kados
mekaten wau mangga tansah kita jagi lan kita lestarekaken ing wulan syawal
ngantos benjing kita pinanggih malih kaliyan wulan ramadhan ingkang badhe
dhateng. Pembangunan negari kita Indonesia menika sanget mbetahaken
manungsa-manungsa ingkang muttaqien kangge ningkataken daya saing bangsa ing
era keterbukaan menika lan kangge mujudaken tatananing masyarakat ingkang
baldatun thayibatun wa robbun ghafur. Bangsa Indonesia mbetahaken langkung
kathah manusia ingkang imanipun lebet, imanipun lurus, ingkang tauhidipun
jejeg. Bangsa Indonesia ugi mbetahaken manungsa ingkang sregep ngibadahipun,
khususipun ngibadah shalat, lan ingkang dermawan lan loma, ingkang nggadhahi
sifat sabar saha tansah damel amal kesaenan dhumateng sesami gesang.
Ma’asyiralmuslimin rahimakumullah,
Mangga kita sambut Idul Fitri kanthi raos syukur lan
waspada. Sebab saksampunipun rampung perjuangan kita ing wulan siyam kepengker
menika, sampun nengga perjuangan sanesipun ingkang kedah kita tindakaken.
فَإِذَا فَرَغۡتَ فَٱنصَبۡ ٧ وَإِلَىٰ رَبِّكَ فَٱرۡغَب ٨
“Mangka yen sira kabeh wus rampung sawijining pakaryan,
enggal tindakna pakaryan liyane kanthi temen-temen. Lan mung marang pangeranira
sira kabeh duwe pangarep-arep”
(QS.
Al-Insyirah 7-8)
Muhammadiyah ingkang nyawiji nindakaken Dakwah Islam
Amar Ma’ruf Nahy Munkar tansah sesarengan masyarakat mbudi daya mbangun
masyarakat kanthi program-program ingkang dipun susun wonten ing
mapinten-pinten bab sae bab agami, pendidikan, social, ekonomi, kabudayan lan
sanes-sanesipun. Muhammadiyah tansah manjing ajur ajer sak tengahing masyarakat
mbudi daya amrih mawujudipun masyarakat ingkang sejahtera lahir lan batin. Kanthi
andhaping manah, Muhammadiyah nyuwun sedaya panyengkuyungipun masyarakat kangge
mujudaken cita-cita bangsa Indonesia mbangun masyarakat ingkang sejahtera lahir
lan batin.
Ma’asyiralMuslimin rahimakumullah,
Kangge mungkasi khutbah singkat enjing menika, mangga
kita sesarengan nyuwun wonten ngarsa dalem Allah SWT kanthi manah ingkang
saestu lan kebak pengajeng-ajeng, mugi sedaya amal ibadah kita ing wulan
ramadhan katampi lan pikantuk ganjaran ingkang langkung kathah. Mugi-mugi kita
sedaya tansah kaparingan hidayah, inayahipun, kangge nindakaken tugas-tugas
kita pinangka pangarsaning masyarakat lan anggota masyarakat, lan kita taksih
kepareng kapanggihaken wulan ramadhan tahun ingkang badhe dhateng.
الْحَمْدُ لِلّهِ رَبِّ الْعَالَمِيْنَ
وَالصَّلاَةُ وَالسَّلاَمُ عَلَى نَبِيِّنَا مُحَمَّدٍ وَعَلَى الِهِ
وَأَصْحَابِهِ اَجْمَعِيْنَ. اللّهُمَّ اغْفِرْ لِلْمُسْلِمِيْنَ وَالْمُسْلِمَاتِ
وَالْمُؤْمِنِيْنَ وَالْمُؤْمِنَاتِ، اْلأَحْيَاءِ مِنْهُمْ وَاْلأَمْوَاتِ،
إِنَّكَ سَمِيْعٌ قَرِيْبٌ مُجِيْبُ الدَّعْوَاتِ، يَا قَاضِيَ الْحَاجَاتِ.
اللّهُمَّ اغْفِرْ لَنَا ذُنُوْبَنَا وَإِسْرَافَنَا فِي أَمْرِنَا وَثَبِّتْ
أَقْدَامَنَا وَانْصُرْنَا عَلَى الْقَوْمِ الْكَافِرِيْنَ. أَللَّهُمَّ إِنَّا
نَسْأَلُكَ الْجَنَّةَ وَنَعُوْذُ بِكَ مِنَ النَّارِ. أَللَّهُمَّ إِنَّا
نَسْأَلُكَ الْهُدَى وَالتُّقَى وَالْعَفَافَ وَالْغِنَى. رَبِّ أَوْزِعْنِيْ أَنْ
أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَى وَالِدَيَّ وَأَنْ
أَعْمَلَ صَالِحًا تَرْضَاهُ وَأَدْخِلْنِيْ بِرَحْمَتِكَ فِي عِبَادِكَ
الصَّالِحِيْنَ. رَبَّنَا آتِنَا مِنْ لَدُنْكَ رَحْمَةً وَهَيِّءْ لَنَا مِنْ
أَمْرِنَا رَشَدًا. رَبَّنَا آتِنَا فِي الدُّنْيَا حَسَنَةً وَفِى اْلآَخِرَةِ
حَسَنَةً وَقِنَا عَذَابَ النَّارِ. سُبْحَانَ رَبِّكَ رَبِّ الْعِزَّةِ عَمَّا
يَصِفُوْنَ وَسَلاَمٌ عَلَى الْمُرْسَلِيْنَ، وَالْحَمْدُ للهِ رَبِّ
الْعَلَمِيْنَ.
KHUTBAH IDUL FITRI 1437 H
PIMPINAN CABANG MUHAMMADIYAH
SRANDAKAN
1437 H / 2016 M
Tidak ada komentar:
Posting Komentar