Muhammadiyah   (Dandanggula)

Wus antara tekeng manca nagri

Muhammadyah kinarya tuladha

Islam yekti agamane

Tansah dipun gegulung

Sarana  manembah mring Gusti

Allah kang Maha Kwasa

Agung sakalangkung

Umat sami becik rata

Tan wenten kang cicir gesang nguni

Donya lan akheratnya

Wus tumekeng tlatah manca nagri

Muhammadyah pakempalan kita

Hanjurung mring lampah sae

Nahi munkar amar makruf

Adhedasar qur’an lan hadis

Manut kukum negara

Umat kang jinangkung

Tebih saking lampah nistha

samubarang tindak kanthi ngati-ati

Dadya ngibadah kita 

Wus makarya satus papat warsi

Muhammadiyah tlatah Nuswantara

(A)Mar makruf nahi munkare

Datan wegah ing ewuh

Mrih raharja gesang puniki

Dhasar qur’an lan sunnah

Gya nenetepi dhawuh

Allah lawan Rasulullah

Kanthi sabar kawaskitan trus akhanti

Bagya ingkang pinanggya

Dadya sira manungsa kang bekti

Mring Ilahi dzat Maha Kuwasa

Tansah manembah uripe

Becik anggenya srawung

Manut kukum lawan agami

Sabarang pangandikan

Dadya ing pitutur

Kebak budi myang sasama

Lahir batin nyuwun ridhaning ilahi

Gesang manggih raharja

                                                                             Ki Dasa Purwaatmaja

(Eka wuryanta)

SINOM

Bebadan Muhammadiyah

Ngudi ridhaning Ilahi

Amar Makruf Nahi Munkar

Ngibadah akanthi ngelmi

Ngrembaka sagung nagri

Ing jabaning rangkah tamtu

Nuladha Rasulullah

Tumanjem mungging pribadi

Raharjo gesang donya lan akheratnya

Pangkur

Wus ginaris Kang Kuwasa

Manungsa datan bisa nyelaki pati

Tamtu kadya janjinipun

Duk aneng guwa garba

Datan mingkuh sanajan katingal ewuh

Sadaya tansah samekta

Yen wus tekeng titi wanci

Kanjeng Rasul wus ngandika

Sapa wong kang percaya marang Ilahi

Lan dina akhir neku

Mangka wajib mring sira

Kurmat marang sadulur ingkang mertamu

Padhang sumeh ulatira

Pangucap becik sayekti

Kinanti

Bekti maring rama ibu

Iku wajibipun siwi

Lamun sakarone sepuh

Den tambah anggonmu bekti

Ajwa pisan sira ngucap

Jalari gerah penggalih.